ព័ត៌មានក្នុងខេត្ត

កំពង់ស្ពឺ÷ ព្រឹកថ្ងៃសៅរ៌ ៣ រោចខែទុតិយាសាឍឆ្នាំមមី អដ្ឋស័ក ព.ស ២៥៧០ត្រូវនឹងថ្ងៃទី០១ខែសីហាឆ្នាំ២០២៦ លោកជំទាវខេង សំវ៉ាដា អ្នកតំណាងរាស្រ្ដមណ្ឌលខេត្តកំពង់ស្ពឺ  អនុប្រធានគណៈកម្មការទី៧ នៃរដ្ឋសភា និងជាប្រធានក្រុមការងារចុះមូលដ្ឋានស្រុកសំរោងទង/ឃុំស្គុះ  រួមដំណើរដោយសហការី ជាក្រុមការងារចុះជួយឃុំស្គុះជាច្រើនរូបទៀត បានអញ្ជើញ និងនាំយកនូវទៀនចំណាំព្រះវស្សា ទៅវេប្រគេន ព្រះសង្ឍចំនួន ៨១ អង្គ គង់ចាំព្រះវស្សា អស់ត្រីមាស ក្នុងពុទ្ធសីមាវត្តចំនួន ៥ វត្ត”១-វត្តចំប៉ាទេព ២-វត្តអង្គពោធិ៍ ៣-វត្តគីរីអង្គសរ(ហៅភ្នំជាល )៤-វត្តបឹងតូច” ស្ថិតនៅឃុំស្គុះ ស្រុកសំរោងទង  ៥-វត្តព្រៃបឹង ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ ។

កំពង់ស្ពឺ÷ នាថ្ងៃទី០១ ខែសីហា ឆ្នាំ២០២៦ ឯកឧត្តម ភោគ សុវណ្ណរិទ្ធ ប្រធានក្រុមការងាររាជរដ្ឋាភិបាលចុះមូលដ្ឋានស្រុកថ្ពង ខេត្តកំពង់ស្ពឺ រួមជាមួយក្រុមការងារភូមិ ឃុំ ស្រុក បានចូលរួមប្រគេនទៀនព្រះវស្សា ដល់ព្រះសង្ឃគង់នៅវត្តថ្មីដងទង់ ស្ថិតក្នុងឃុំរុងរឿង ស្រុកថ្ពង ខេត្តកំពង់ស្ពឺ ដែលទេយ្យវត្ថុទាំងអស់រួមមាន:

កំពង់ស្ពឺ៖ ថ្ងៃទី៣០ ខែកក្កដា ឆ្នាំ២០២៦---ឯកឧត្តម យឹម សុខុម ប្រធានក្រុមប្រឹក្សាខេត្ត និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត ព្រមទាំង លោកជំទាវ ម៉េង វ៉ាន់ដានីន ​អញ្ជើញរាប់បាតព្រះសង្ឃនិមន្តគោចរបិណ្ឌបាតចំនួន២០០អង្គ ដែលជាថ្ងៃចូលព្រះវស្សា និងជាបុណ្យប្រពៃណីជាតិដ៏ធំដើម្បីឧទ្ទិសកុសល និងបូជាចំពោះព្រះរតនត្រៃ នៅបរិវេណខាងមុខសាលាខេត្តកំពង់ស្ពឺ ។ ពិធីបុណ្យក៏មានការអញ្ជើញចូលរួមផងដែរពីសំណាក់ ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធានមន្ទីរ-អង្គភាពជុំវិញខេត្ត មន្ត្រីរាជការ កងកម្លាំងទាំង៣ ព្រមទាំងពុទ្ធបរិស័ទយ៉ាងច្រើនកុះករ ដើម្បីចូលរួមចាប់មគ្គផល និងរាប់បាតប្រគល់ទានថ្វាយព្រះសង្ឃដែលបាននិមន្តគោចរបិណ្ឌបាត។

កំពង់ស្ពឺ៖ ថ្ងៃទី៣០ ខែកក្កដា ឆ្នាំ២០២៦--- រដ្ឋបាលខេត្តកំពង់ស្ពឺ បានរៀបចំពិធីវេរប្រគេនទានព្រះវស្សាដល់វត្តចំនួន ១៨វត្ត ដែលបានប្រារព្ធឡើងនៅវត្តមុនីរង្សី រតនារាម (ហៅវត្តម្រុំខាងជើង) ក្រោមអធិបតីភាព ឯកឧត្តម យឹម សុខុម ប្រធានក្រុមប្រឹក្សាខេត្ត និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត ព្រមទាំង លោកជំទាវ ម៉េង វ៉ាន់ដានីន និង មានការអញ្ជើញចូលរួមផងដែរពីសំណាក់ ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធានមន្ទីរ-អង្គភាពជុំវិញខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងពុទ្ធបរិស័ទយ៉ាងច្រើនកុះករ ដើម្បីចូលរួមចាប់មគ្គផល និងរាប់បាតប្រគល់ទានថ្វាយព្រះសង្ឃដែលបាននិមន្តគោចរបិណ្ឌបាតយ៉ាងអធិកអធម។

កំពង់ស្ពឺ÷ ថ្ងៃអង្គារ ៧កើត ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២១ ខែកក្កដាឆ្នាំ២០២៦ ឯកឧត្តម ជួន វន រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងជាប្រធានក្រុមការងារចុះមូលដ្ឋានស្រុកគងពិសី និងលោកជំទាវ ឯក ផល្លី បាននាំយកសម្ភារៈបរិក្ខាប្រគេនទៀនចំណាំព្រះវស្សាចំនួន ៥វត្ត ក្នុងស្រុកគងពិសី ខេត្តកំពង់ស្ពឺ។ ក្នុងពិធីនេះមានការអញ្ជើញចូលរួមពីលោក ម៉ែន ពុំ ប្រធានក្រុមប្រឹក្សាស្រុក លោក ហន ពិសិដ្ឋ អភិបាល នៃគណៈអភិបាលស្រុក ថ្នាក់ដឹកនាំស្រុក មន្ត្រីរាជការជុំវិញស្រុក ថ្នាក់ដឹកនាំឃុំ ភូមិ ពាក់ព័ន្ធ ព្រមជាមួយលោកអាចារ្យ លោកយាយ លោកតា និងពុទ្ធបរិស័ទចំណុះជើងវត្ត ដែលធ្វើឡើងចំនួនពីរទីតាំង÷ ស្ថិតនៅវត្តសាលព្រឹក្ស ហៅវត្តត្រាំខ្នារ ឃុំស្នំក្រពើ និងនៅវត្តស្រង់អង្គស្នោរ ឃុំស្រង់ ដោយនិមន្តព្រះសង្ឃចំនួន ៣វត្តបន្ថែម មាន វត្តចំប៉ាចារ៍ ឃុំអង្គពពេល វត្តអង្គរោង ឃុំមហាឫស្សី និងវត្តតេជៈ នៅឃុំស្រង់ ស្រុកគងពិសី ខេត្តកំពង់ស្ពឺ។

ខេត្តកំពង់ស្ពឺ៖ នៅរសៀលថ្ងៃសុក្រ ១២ កើត ខែបឋមាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២៦ ខែមិថុនា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនាបានបន្តចុះសំណេះសំណាល និងថ្វាយបង្គំសួរសុខទុក្ខព្រះនាយក ព្រះឧទ្ទេសាចារ្យ និងសមណសិស្ស នៃ សាលាពុទ្ធិកបឋមសិក្សាកណ្តោកដុំ ស្ថិតក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ ក្រោមព្រះអធិបតីភាព ព្រះសីលធម្មវង្សា មុំ សុខុន ព្រះគ្រូធម្មចារី ព្រះគ្រូអនុគណក្រុងច្បារមន អមដោយព្រះមន្ត្រីសង្ឃគ្រប់ព្រះអង្គ។បច្ចុប្បន្ន សាលាពុទ្ធិកបឋមសិក្សាកណ្តោកដុំ មានសមណសិស្សចំនួន ៥៦ព្រះអង្គ កំពុងសិក្សាក្នុង ២ថ្នាក់ ដោយបានខិតខំសិក្សាព្រះធម៌ ព្រះវិន័យ ភាសាបាលី និងចំណេះដឹងទូទៅ សំដៅអភិវឌ្ឍខ្លួនឱ្យក្លាយជាព្រះសង្ឃដែលមានសីល មានបញ្ញា និងជាធនធានដ៏មានតម្លៃសម្រាប់ព្រះពុទ្ធសាសនា និងសង្គមជាតិ។

កំពង់ស្ពឺ៖ នៅរសៀលថ្ងៃអង្គារ ៩ កើត ខែបឋមាសាឍ ឆ្នាំមមី អដ្ឋស័ក ពស ២៥៧០ ត្រូវនឹងថ្ងៃទី២៣ ខែមិថុនា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនាបានបន្តចុះសំណេះសំណាល និងថ្វាយបង្គំសួរសុខទុក្ខព្រះនាយក ព្រះឧទ្ទេសាចារ្យ និងសមណសិស្ស នៃ សាលាពុទ្ធិកបឋមសិក្សាវត្ដសុវណ្ណគិរី (ហៅភ្នំកំប៉ូត) ដែលស្ថិតក្នុងសង្កាត់ច្បារមន ក្រុងច្បារមន ខេត្តកំពង់ស្ពឺ ក្រោមព្រះអធិបតីភាព ព្រះសីលធម្មវង្សា មុំ សុខុន ព្រះគ្រូធម្មចារី ព្រះគ្រូអនុគណក្រុងច្បារមន អមដោយព្រះមន្ត្រីសង្ឃគ្រប់ព្រះអង្គ។ សាលាពុទ្ធិកបឋមសិក្សាវត្តអង្គប្រាសាទ បច្ចុប្បន្នមានសមណសិស្សចំនួន ៤៦ព្រះអង្គ សិក្សាក្នុង ៣ថ្នាក់ ដែលកំពុងខិតខំសិក្សារៀនសូត្រព្រះធម្មវិន័យ និងចំណេះដឹងនានា ដើម្បីត្រៀមខ្លួនជាធនធានដ៏មានតម្លៃសម្រាប់ព្រះពុទ្ធសាសនា និងសង្គមជាតិ។

ត្បូងឃុំ៖ ថ្ងៃទី២១ ខែមិថុនា ឆ្នាំ២០២៦--- ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ អញ្ជើញចូលរួមអមដំណើរឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា អញ្ជើញជាអធិបតីភាពក្នុងពិធីបុណ្យសូត្រមន្តបង្សុកូល ជូនដល់វិញា្ញណក្ខន្ធ វីរយុទ្ធជន វីរយុទ្ធនារី និងប្រជាជនកម្ពុជា រំលឹកខួបលើកទី៤៩ នៃទិវាចងចាំ ដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត ២០ មិថុនា ១៩៧៧-២០ មិថុនា ២០២៦ នៅតំបន់ប្រវត្តិសាស្រ្ត យោធាតេជោ-កោះថ្ម X16 ។