ព័ត៌មានក្នុងខេត្ត

កំពង់ស្ពឺ៖ នៅរសៀលថ្ងៃពុធ ២ រោច ខែបឋមាសាឍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី១ ខែកក្កដា ឆ្នាំ២០២៦ ក្រុមការងារទទួលបន្ទុកការងារនិវត្តជន និងអតីតយុទ្ធជន នៃក្រុមការងារសិក្សាស្រាវជ្រាវ និងចិញ្ចឹមចលនាខេត្តកំពង់ស្ពឺ ដឹកនាំដោយឯកឧត្តម ឈួរ សុបញ្ញា បាននាំយកផ្លែឈើ និងថវិការបស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ទៅសួរសុខទុក្ខលោក ហ៊ីង សាមុត អតីតមេឃុំអង្គពពេល ស្រុកគងពិសី ដែលកំពុងមានជំងឺ និងសម្រាកព្យាបាលនៅគេហដ្ឋាន ស្ថិតក្នុងភូមិកំណប់ ឃុំអង្គពពេល ស្រុកគងពិសី ខេត្តកំពង់ស្ពឺ។

កំពង់ស្ពឺ៖ នៅព្រឹកថ្ងៃព្រហស្បតិ៍ ៣ រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែកក្កដា ឆ្នាំ២០២៦ ក្រោយពីមានសំណូមពរពីប្រជនជនតាមរយៈវេទិកាសាធារណៈឃុំដំណាក់រាំងកន្លងមក ដែលត្រូវបានរៀបចំឡើងប្រកបដោយភាពបើកចំហ និងស្មារតីទទួលខុសត្រូវចំពោះប្រជាពលរដ្ឋ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនាបានដឹកនាំក្រុមការងាររាជរដ្ឋាភិបាលបន្តចុះពិនិត្យ និងដោះស្រាយសំណូមពររបស់ប្រជាពលរដ្ឋនៅភូមិទួលសំបូរ ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ ដើម្បីឆ្លើយតបនឹងបញ្ហា និងតម្រូវការជាក់ស្តែងនៅមូលដ្ឋាន។

(កំពង់ស្ពឺ)៖ ថ្ងៃទី២ ខែមិថុនា ឆ្នាំ២០២៦ មន្ទីរអភិវឌ្ឍន៍ជនបទខេត្តកំពង់ស្ពឺ បានរៀបចំកិច្ចប្រជុំបូកសរុបលទ្ធផលការងារផ្គត់ផ្គង់ទឹកស្អាត និងអនាម័យជនបទ ប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២៦ របស់ក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទថ្នាក់ខេត្ត (PTWG/RWSSH) ក្រោមអធិបតីភាព លោក ងួន ឡាញ់ នាយករងរដ្ឋបាលសាលាខេត្តកំពង់ស្ពឺ និងលោក ប៉ាសួង សៅគន្ធ អនុប្រធានមន្ទីរអភិវឌ្ឍន៍ជនបទខេត្ត ដោយមានការចូលរួមពីលោក លោកស្រីប្រធាន អនុប្រធានក្រុមការងារ PTWG មន្ទីរអង្គភាពពាក់ព័ន្ធ  អង្គការដៃគូអភិវឌ្ឍន៍ មេឃុំ-ចៅសង្កាត់ និងមន្រ្តីពាក់ព័ន្ធជាច្រើនរូបទៀត។

កំពង់ស្ពឺ៖ ថ្ងៃទី២ ខែកក្កដា ឆ្នាំ២០២៦---លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ អនុប្រធានសហភាពសហព័ន្ធយុវជនកម្ពុជាខេត្ត អនុប្រធានកិត្តិយស សាខាកាកបាទក្រហមកម្ពុជាខេត្ត បានដឹកនាំក្រុមការងារ អ.ហ ខេត្ត និងសហភាពសហព័ន្ធយុវជន នៃបញ្ជាការដ្ឋាន កងរាជអាវុធហត្ថខេត្តកំពង់ស្ពឺ ព្រមទាំងមានការចូលរួមពីរអ្នកស្ម័គ្រចិត្តកាកបាទក្រហមកម្ពុជាខេត្ត អញ្ជើញចុះសួរសុខទុក្ខ វីរៈកងទ័ព លោក អនុសេនីយ៍ត្រី ផាន់ ផល្លា អាយុ៤៧ឆ្នាំ ជំនួយការ ការិយាល័យឃោសនាព័ត៌មាន ដែលកំពុងសម្រាកព្យាបាយជំងឺពុកក្បាលឆ្អឹងភ្លៅទាំងសងខាង នៅភូមិផ្សារចាស់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ បច្ចុប្បន្នដែលកំពុងឈរជើងការពារបូរណភាពទឹកដី នៅទិសទី៣ ប្រាសាទតាមន្ត តាក្របី ខេត្តឧត្តរមានជ័យ។

កំពង់ស្ពឺ៖ ថ្ងៃទី១ ខែកក្កដា ឆ្នាំ២០២៦---ឯកឧត្តមបណ្ឌិតជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ អញ្ជើញចូលរួមកិច្ចប្រជុំ ប្រចាំអឌ្ឍមាសដើម្បីតាមដានវឌ្ឍនភាពការងារបង្ក្រាបបទ ល្មើសឆបោកតាមប្រព័ន្ធបច្ចេកវិទ្យា (Online Scams) ក្រោម អធិបតីភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តាមរយៈប្រព័ន្ធបញ្ជូនរូបភាពនិងសំឡេងពីចម្ងាយ (Online Zoom)។ ដោយមានការអញ្ជើញចូលរួមពីសំណាក់ លោកអភិបាលរងខេត្ត លោកនាយកដ្ឋបាលសាលាខេត្ត លោកស្នងការខេត្ត មេបញ្ជាការរងកងរាជអាវុធហត្ថខេត្ត លោកអភិបាលក្រុង/ស្រុកទាំង៩ ព្រមទាំងមន្ត្រីបច្ចេកទេសមួយចំនួនទៀត។

កំពង់ស្ពឺ៖ នៅព្រឹកថ្ងៃពុធ ២រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០១ ខែកក្កដា ឆ្នាំ២០២៦ ឯកឧត្តម ឈួរ សុបញ្ញា រដ្ឋលេខាធិការក្រសួងធម្មការនិងសាសនាបានអញ្ជើញជាវាគ្មិនក្នុងកម្មវិធីអប់រំតាមព្រះពុទ្ធមាគ៌ា ក្រោមប្រធានបទ «គុណធម៌របស់យុវជននិងកុមាររស់នៅក្នុងសង្គម» ដល់សិស្សានុសិស្សចំនួន ៩៦៤នាក់ នៃសាលាបឋមសិក្សា និងអនុវិទ្យាល័យភ្នំតូច ស្ថិតនៅឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ ក្រោមអធិបតីភាព ឯកឧត្តមបណ្ឌិត អ៊ុក កោសា ទីប្រឹក្សាសម្តេចអគ្គមហាសេនាបតីតេជោ ហ៊ុន សែន និង ព្រះវិរញ្ញាណ អ៊ុំ ផេង ព្រះលេខាគណខេត្តកំពង់ស្ពឺ និងជាព្រះអនុគណស្រុកសាមគ្គីមុនីជ័យ ដោយមានការចូលរួមពីលោកអភិបាលរងស្រុក អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សជាច្រើនរូប។

កំពង់ស្ពឺ៖ ថ្ងៃទី៣០ ខែមិថុនា ឆ្នាំ២០២៦---លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺ និង លោក ជា សុខុន  អភិបាលរង នៃគណៈអភិបាលស្រុកបសេដ្ឋ អញ្ជើញជាអធិបតីក្នុងពិធី ផ្សព្វផ្សាយយុទ្ធនាការក្រោមប្រធានបទ «និយាយថាទេ ចំពោះព័ត៌មានក្លែងក្លាយ» ជំហានទី២ ដែលពិធីនេះបានប្រព្រឹត្តទៅនៅបរិវេណវិទ្យាល័យ សម្តេចឪ សម្តេចម៉ែ បសេដ្ឋ ស្ថិតក្នុងស្រុកបសេដ្ឋ ខេត្តកំពង់ស្ពឺ។  ដោយមានការអញ្ជើញចូលរួមពីសំណាក់តំណាងកងកម្លាំងទាំង៣ប្រភេទ លោកគ្រូ-អ្នកគ្រូ សិស្សានុសិស្ស ព្រមទាំងមន្ត្រីរាជការ និងអ្នកពាក់ព័ន្ធ សរុបប្រមាណ ១,៥០០នាក់។ យុទ្ធនាការជំហានទី២ នេះ ត្រូវបានរៀបចំឡើងក្នុងគោលបំណងបន្តដាស់តឿន និងលើកកម្ពស់ការយល់ដឹងជាសាធារណៈ ពិសេសក្នុងស្រទាប់យុវវ័យ ដែលជាអ្នកប្រើប្រាស់បណ្តាញសង្គមយ៉ាងសកម្ម ឱ្យមានស្មារតីប្រុងប្រយ័ត្នខ្ពស់ ប្រកបដោយគរុកោសល្យ និងការទទួលខុសត្រូវ ក្នុងការទទួល និងចែករំលែកព័ត៌មាន។ យុទ្ធនាការនេះក៏ជាការរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការប្រយុទ្ធប្រឆាំង និងទប់ស្កាត់ការរីករាលដាលនៃព័ត៌មានក្លែងក្លាយ ដែលបំពុលបរិយាកាសសង្គម បង្កភាពវឹកវរ និងប៉ះពាល់ដល់សន្តិសុខសណ្តាប់ធ្នាប់សាធារណៈ។

កំពង់ស្ពឺ÷ កិច្ចប្រជុំត្រៀមរៀបចំប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន និង ពិធីដុតបំផ្លាញគ្រឿងញៀន ក្រោមអធិបតីភាព ឯកឧត្តមបណ្ឌិត តូច ប៉ូលីវ៉ា អភិបាលរង នៃគណៈអភិបាល ខេត្តកំពង់ស្ពឺ ដែលប្រព្រឹត្តទៅនៅថ្ងៃអង្គារ ទី៣០ ខែមិថុនា ឆ្នាំ២០២៦ នៅសាលប្រជុំ កង ហ៊ាង ជាន់ទី១ នៃអគាររដ្ឋបាលខេត្ត។ ក្រោយពីមានកិច្ចប្រជុំពិភាក្សា និងដាក់ផែនការដល់មន្ទីរអង្គភាពពាក់ព័ន្ធឲ្យអនុវត្តរួចមក លោកអភិបាលរងខេត្តបាន ដឹកនាំតំណាងមន្ទីរជំនាញចុះពិនិត្យទីតាំងផ្ទាល់ស្ថិតនៅភូមិ តាមុល សង្កាត់ច្បារមន ក្រុងច្បារមនខេត្តកំពង់ស្ពឺ៕

កំពង់ស្ពឺ÷នៅថ្ងៃទី ៣០ ខែមិថុនា ឆ្នាំ ២០២៦ លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺសហការជាមួយថ្នាក់ដឹកនាំនិងសិក្សានុសិស្ស នៅវិទ្យាល័យសម្ដេចម៉ែ សម្ដេចឪ ដើម្បីបញ្ជ្រាបការយល់ដឹងអំពីព័ត៌មានក្លែងក្លាយ ដល់ស្រទាប់យុវជន នៅក្នុងស្រុកបសេដ្ឋ ខេត្តកំពង់ស្ពឺ បណ្ដុះស្មារតីទទួលខុសត្រូវក្នុងការចែករំលែកព័ត៌មាន! យុទ្ធនាការផ្សព្វផ្សាយស្តីពី «ការទប់ស្កាត់ព័ត៌មានក្លែងក្លាយ» នៅវិទ្យាល័យសម្ដេចឪសម្ដេចម៉ែបរសេដ្ឋ ដើម្បីរួមគ្នាកសាងសង្គមឌីជីថលប្រកបដោយសុវត្ថិភាព និងទំនុកចិត្ត។

កំពង់ស្ពឺ៖ លោក ហន ភក្តី អភិបាលរងខេត្ត បានដឹកនាំកិច្ចប្រជុំពិភាក្សាដោះស្រាយបញ្ហាប្រជាពលរដ្ឋចំនួន៦ គ្រួសារ ដែលមានទីលំនៅ នៅមុខបរិវេណសាលាបឋមសិក្សាអង្គខ្មៅ និងវត្តអង្គខ្មៅ ខេត្តកំពង់ស្ពឺ នារសៀលថ្ងៃទី២៩ ខែមិថុនា ឆ្នាំ២០២៦ នៅអគាររដ្ឋបាលខេត្ត (សាលប្រជុំ កង ហ៊ាង,ជាន់ទី១)។

កំពង់ស្ពឺ÷រសៀលថ្ងៃទី ២៩ ខែមិថុនា ឆ្នាំ ២០២៦ លោក ហេង ស៊ីណា នាយករដ្ឋបាលស្រុកគងពិសី សមាជិកគណៈកម្មាធិការស្រុក អនុប្រធានយុវជនស្រុក និងជាក្រុមការងារចុះជួយឃុំព្រៃញាតិ  បានបន្តអញ្ជើញដឹកនាំយុវជនស្រុក ឃុំ ចុះសួរសុខទុក្ខ និងនាំយកសម្ភារ: ថវិកាឧបត្ថម្ភជូនគ្រួសារជួបការលំបាកចំនួន ២គ្រួសារ ស្ថិតនៅភូមិព្រៃជរ ឃុំព្រៃញាតិ ស្រុកគងពិសី ខេត្តកំពង់ស្ពឺ។ សកម្មភាពនេះធ្វើឡើងជារៀងរាល់សប្តាហ៍នៅថ្ងៃអាទិត្យ ដែលមានការនិមន្តចូលរួមពីព្រះតេជគុណចៅអធិការវត្តអង្គតាភេម យុវជនគណបក្សស្រុក ថ្នាក់ដឹកនាំគណបក្សឃុំព្រៃញាតិ និងយុវជនគណបក្សឃុំ-ភូមិ ។ សម្ភារៈ និងថវិកានេះបានពីការចូលរួមឧបត្ថម្ភរបស់ព្រះតេជគុណ ព្រមជាមួយក្រុមយុវជនស្រុក ឃុំ ទាំងអស់គ្នា ក្នុង១គ្រួសារៗទទួលបានអង្គរ២៥ គីឡូក្រាម ទឹកសុទ្ធ មួយកេស មីមួយកេស ទឹកត្រីទឹកស៊ីអ៊ីវពីរយួរ និងថវិកាចំនួន ៤០,០០០រៀល។

កំពង់ស្ពឺ÷ សំណូមពរដល់សមាជិកសមាជិកា គណៈកម្មាធិការ គ.ក.ស.ក.ខេត្ត បូកសរុបជូនអង្គប្រជុំ ពិនិត្យលើរបាយកាណ៍ប្រចាំខែមិថុនាដែលក្រុមការងារអចិន្ត្រៃយ៍គ.ក.ស.ក.ខេត្ត តើមានអ្វីបន្ថែមបន្ថយដែឬទេ? និង ស្នើសុំសមាជិកអង្គប្រជុំចូលរួម ផ្តល់ជាមតិបំពេញបន្ថែមដើម្បីមាន របាយការណ៍ពេញលេញគ្រប់ជ្រុងជ្រោយ លោកជំទាវ ចន យឿន សមាជិកក្រុមប្រឹក្សាខេត្ត ប្រធានគណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត មានប្រសាសន៍ដូច្នេះគ្រាដែលលោកជំទាវបានអញ្ជើញជាធិបតីក្នុងពិធីប្រជុំសាមញ្ញរបស់គណៈកម្មាធិការពិគ្រោះយោបល់ស្ត្រី និងកុមារថ្នាក់ខេត្តលើកទី ២១ អាណិតទី ៤ ខែមិថុនា ឆ្នាំ ២០២៦ ដោយមានសមាសភាពចូលរួមពីតំណាងក្រុងស្រុកទាំង៩ មន្ទីរអង្គភាពពាក់ព័ន្ធសរុបប្រមាណជា ៣៤ នាក់ អគាររដ្ឋបាលខេត្ត សាលប្រជុំ យឹម សុខុម នាព្រឹកថ្ងៃទី២៩ ខែមិថុនា ឆ្នាំ ២០២៦។