បាត់ដំបង: នាថ្ងៃទី៤ ខែវិច្ឆិកា ឆ្នាំ២០២៦ ឯកឧត្តម សុខ លូ អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង បានចាត់តាំង ឯកឧត្តម ផេង សិទ្ធី អនុប្រធានអចិន្ត្រៃយ៍គណៈកម្មាធិការសាខា ដោយមានការចូលរួមពីឯកឧត្តម ទីន សារ៉ាវុធ អភិបាលរងខេត្ត និង អមដំណើរដោយលោកនាយកសាខា និងក្រុមការងារ បានចុះពិនិត្យផ្ទាល់ពីវឌ្ឍនភាពនៃការសាងសង់ «ផ្ទះមនុស្សធម៌» ចំនួន ២ខ្នង ស្មើនឹង ២គ្រួសារ ស្ថិតនៅសង្កាត់អូចារ ក្រុងបាត់ដំបង និងឃុំតាប៉ុន ស្រុកសង្កែ ដើម្បីត្រៀមរៀបចំពិធីប្រគល់-ទទួលជាផ្លូវការនាពេលខាងមុខដ៏ខ្លីនេះ។

បាត់ដំបង៖ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង អញ្ជើញជាអធិបតីក្នុងពិធីសំណេះសំណាល និងជូនដំណើរប្រជាពលរដ្ឋត្រូវចូលបំពេញកាតព្វកិច្ចយោធាទៅសាលាហ្វឹកហ្វឺនកងទ័ព ដែលពិធីនេះធ្វើឡើងនៅថ្ងៃទី៤ ខែវិច្ឆិកា ឆ្នាំ២០២៦ នៅទីបញ្ជាការតំបន់ប្រតិបត្តិការសឹករងខេត្តបាត់ដំបង។

បាត់ដំបង៖នៅថ្ងៃទី៣ ខែវិច្ឆិកា ឆ្នាំ២០២៦ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបងនាំយកពូជស្រូវដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈប្រព័ន្ធស្បៀងបម្រុងកម្ពុជាផ្ដល់ជូនដល់ប្រជាកសិករចំនួន៨៩៩គ្រួសារ ក្នុងឃុំអន្លង់វិល ឃុំកំពង់ព្រៀង និងឃុំកំពង់ព្រះ ស្រុកសង្កែ ខេត្តបាត់ដំបង ដើម្បីជួយសម្រួលដល់ការបង្កបង្កើនផលស្តារឡើងវិញបន្ទាប់ពីរងផលប៉ះពាល់ដោយជំនន់ទឹកភ្លៀង។

ខេត្តបាត់ដំបង៖ ក្រោយពីបានទទួលព័ត៌មានតាមបណ្តាញសង្គម ហ្វេសប៊ុក (Facebook) ពាក់ព័ន្ធនឹងស្ថានភាពជីវភាពរស់នៅ របស់គ្រួសារ លោក អ៊ួន ដានឿន, ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត នៅព្រឹកថ្ងៃទី០៣ ខែវិច្ឆិកា ឆ្នាំ២០២៦ បានចាត់ឱ្យ ឯកឧត្តម ផេង សិទ្ធី អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជាខេត្ត និងសហការី រួមជាមួយមន្ត្រីអនុសាខាកាកបាទក្រហមកម្ពុជាស្រុកថ្មគោល ចុះសួរសុខទុក្ខ និងពិនិត្យមើលស្ថានភាព រស់នៅផ្ទាល់ របស់គ្រួសារប្រជាពលរដ្ឋរងគ្រោះខាងលើ ដែលស្ថិតនៅភូមិកោងកាង ឃុំបន្សាយត្រែង ស្រុកថ្មគោល ខេត្តបាត់ដំបង ដើម្បីផ្តល់ការឧបត្ថម្ភ ជួយសម្រាលទុក្ខលំបាក និងលើកទឹកចិត្តឱ្យមានលទ្ធភាពគ្រប់គ្រាន់ ក្នុងការប្រកបមុខរបរប្រចាំថ្ងៃ។

បាត់ដំបង៖ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានដឹកនាំក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ លោកគ្រូអ្នកគ្រូ យុវជន និងសិស្សានុសិស្សប្រារព្ធពិធីថ្វាយព្រះពរព្រះមហាក្សត្រក្នុងឱកាសព្រះរាជពិធីបុណ្យខួបលើកទី២២ នៃការគ្រងព្រះបរមសិរីរាជសម្បត្តិ។ពិធីនេះធ្វើឡើងនៅសាលប្រជុំសាលាខេត្តបាត់ដំបង នៅថ្ងៃទី២៩ ខែតុលា ឆ្នាំ២០២៦។

បាត់ដំបង៖ នៅរសៀលថ្ងៃទី ២៨ ខែតុលា ឆ្នាំ២០២៦ ឯកឧត្តម កៀង វឌ្ឍនៈ ជំនួយការអគ្គលេខាធិការដ្ឋានកាកបាទក្រហមកម្ពុជា និងក្រុមការងារសាខាកាកបាទក្រហមកម្ពុជា ខេត្តបាត់ដំបង អនុសាខាស្រុកសំឡូត បានអញ្ជើញចូលរួមរំលែកទុក្ខដ៏ក្រៀមក្រំបំផុត និងនាំយកគ្រឿងឧបភោគបរិភោគ ព្រមទាំងលិខិតចូលរួមរំលែកទុក្ខ របស់សម្តេចកិត្តិព្រឹទ្ធបណ្ឌិតប្រធាន ជូនក្រុមគ្រួសារសព ចំពោះមរណភាព លោកព្រឹទ្ឋបាលឯក ផាត់ ជាយដែន កងពលតូចថ្មើរជើង លេខ៥២ យោធភូមិភាគទី៥។