កម្មវិធី ទទក ព័ត៌មានជាតិ និងអន្តរជាតិ ម៉ោង១៧:០០នាទី (ថ្ងៃចន្ទ ៧រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែវិច្ឆិកា ឆ្នាំ២០២៦
កំពង់ស្ពឺ៖ នៅព្រឹកថ្ងៃចន្ទ ៧រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែវិច្ឆិកា ឆ្នាំ២០២៦ ក្រុមការងារចម្រុះថ្នាក់ខេត្ត បានចុះពិនិត្យ និងធ្វើបច្ចុប្បន្នភាពទិន្នន័យនៅលើទីតាំងដី ដែលក្រសួងការពារជាតិបានប្រគល់ជូនគ្រួសារយោធិន ស្ថិតនៅភូមិទួល និងភូមិត្រពាំងក្រឡាញ់ ឃុំមហាសាំង ស្រុកភ្នំស្រួច ខេត្តកំពង់ស្ពឺ ក្រោមការដឹកនាំរបស់លោក ជេត ដុំ នាយករងរដ្ឋបាលសាលាខេត្ត។ ក្នុងឱកាសនោះ ក្រុមការងារបានចុះពិនិត្យស្ថានភាពជាក់ស្តែងនៅតាមទីតាំងដី និងប្រមូលព័ត៌មានពាក់ព័ន្ធ ដើម្បីធ្វើបច្ចុប្បន្នភាពទិន្នន័យឱ្យបានត្រឹមត្រូវ ស្របតាមស្ថានភាពជាក់ស្តែង និងមានភាពច្បាស់លាស់។
កំពង់ស្ពឺ៖ នៅរសៀលថ្ងៃទី២ ខែវិច្ឆិកា ឆ្នាំ២០២៦ លោកស្រី ម៉ែន ស៊ីនួន ប្រធានមន្ទីរព័ត៌មានខេត្តកំពង់ស្ពឺ បានដឹកនាំកិច្ចប្រជុំថ្នាក់ដឹកនាំមន្ទីរ ដើម្បីពង្រឹងការគ្រប់គ្រង និងវិន័យការងាររបស់មន្ត្រីរាជការ។ កិច្ចប្រជុំបានផ្តោតលើការពង្រឹងការគោរពទង់ជាតិរៀងរាល់ព្រឹកថ្ងៃចន្ទ ការធ្វើពលកម្មសម្អាតបរិស្ថានមន្ទីររៀងរាល់ថ្ងៃសុក្រ និងការអនុវត្តវេនយាមប្រចាំការឱ្យបានត្រឹមត្រូវ និងមានការទទួលខុសត្រូវខ្ពស់។
ខេត្តកំពង់ស្ពឺ៖ នាថ្ងៃចន្ទ ៧រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២ ខែវិច្ឆិកា ឆ្នាំ២០២៦ នៅសាលប្រជុំ «ក» នៃមន្ទីរសុខាភិបាលខេត្តកំពង់ស្ពឺ រដ្ឋបាលខេត្តកំពង់ស្ពឺ សហការជាមួយមន្ទីរសុខាភិបាលខេត្ត បានរៀបចំកិច្ចប្រជុំក្រុមការងារសម្រាប់លុបបំបាត់ជំងឺគ្រុនចាញ់ថ្នាក់ខេត្ត ត្រីមាសទី ០៤ ឆ្នាំ២០២៦។
(កំពង់ស្ពឺ)៖ នាព្រឹកថ្ងៃអាទិត្យ ទី០១ ខែវិច្ឆិកា ឆ្នាំ២០២៦ ឯកឧត្តម ណូន រ៉ន ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជាអនុប្រធានទី២ ក្រុមការងារចុះជួយស្រុកសាមគ្គីមុនីជ័យ និងជាប្រធានក្រុមការងារចុះជួយឃុំជំពូព្រឹក្ស បានអញ្ជើញជាអធិបតីភាពដ៏ខ្ពង់ខ្ពស់ក្នុង «ពិធីបើកបវេសនកាលឆ្នាំសិក្សា ២០២៦-២០២៧» ដែលបានរៀបចំឡើងនៅសាលាបឋម និងអនុវិទ្យាល័យជម្ពូព្រឹក្ស ស្ថិតក្នុងឃុំជំពូព្រឹក្ស ស្រុកសាមគ្គីមុនីជ័យ ខេត្តកំពង់ស្ពឺ។
